રિલાયન્સની સ્ટ્રેન્ડ લાઈફ સાયન્સને બ્લડ ટેસ્ટથી કેન્સરની વહેલી ઓળખ માટે ભારતીય પેટન્ટ મળ્યું

સેલ-ફ્રી DNA આધારિત AI-સક્ષમ ટેકનોલોજીથી માત્ર લોહીના નમૂના પરથી કેન્સરની પ્રારંભિક ઓળખ અને તેના મૂળ ટિશ્યુનો અંદાજ લગાવવો બનશે શક્ય

બેંગાલુરૂ

રિલાયન્સ ઇન્ડસ્ટ્રીઝ લિમિટેડની સબસિડિયરી સ્ટ્રેન્ડ લાઈફ સાયન્સીઝે કેન્સરની વહેલી ઓળખ માટે વિકસાવેલા સેલ-ફ્રી DNA (cfDNA) આધારિત ઇન્ટિગ્રેટેડ એનાલિસિસ પ્લેટફોર્મ માટે સીમાચિહ્નરૂપ ભારતીય પેટન્ટ પ્રાપ્ત કર્યું છે. આ નવીન ટેકનોલોજી માત્ર લોહીના એક સરળ નમૂના દ્વારા કેન્સરની પ્રારંભિક તબક્કામાં ઓળખ કરવા તેમજ કેન્સર કયા ટિશ્યુમાંથી શરૂ થયો છે તેનો અંદાજ લગાવવામાં મદદરૂપ બનશે. કંપનીનું માનવું છે કે આ પેટન્ટ ભારત સહિત વિશ્વમાં કેન્સર સ્ક્રીનિંગની દિશામાં મહત્વપૂર્ણ પરિવર્તન લાવી શકે છે.

બ્લડ ટેસ્ટ આધારિત અદ્યતન ટેકનોલોજી

સ્ટ્રેન્ડ લાઈફ સાયન્સ દ્વારા વિકસાવવામાં આવેલા આ પ્લેટફોર્મમાં હાઈ-ક્વોલિટી જીનોમ સિક્વન્સિંગ, કડક ગુણવત્તા નિયંત્રણ, બાયોલોજિકલી ઇન્ફોર્મ્ડ મિથેઈલેશન એનાલિસિસ, ફ્રેગમેન્ટોમિક ફિચર્સ અને આર્ટિફિશિયલ ઇન્ટેલિજન્સ આધારિત મશીન લર્નિંગ મોડેલ્સનું એકીકરણ કરવામાં આવ્યું છે. આ તમામ ટેકનિકના સંયોજનથી માત્ર લોહીના નમૂના પરથી કેન્સરની સંભાવના અને તેના મૂળ ટિશ્યુની ઓળખ વધુ ચોકસાઈથી શક્ય બને છે.

મિથેઈલેશન પેટર્ન પર આધારિત નવીનતા

કેન્સરના વિકાસ દરમિયાન સમગ્ર જીનોમમાં મિથેઈલેશન પેટર્નમાં નોંધપાત્ર ફેરફાર થાય છે, જે તેની મુખ્ય જૈવિક લાક્ષણિકતા માનવામાં આવે છે. નવી પેટન્ટ ટેકનોલોજીની વિશેષતા એ છે કે તે જીનોમ સિક્વન્સિંગ દ્વારા આ મિથેઈલેશન પેટર્નને અત્યંત ઓછા નુકસાન સાથે પ્રાપ્ત કરી શકે છે. પરિણામે, કેન્સરની શરૂઆતના તબક્કામાં પણ અત્યંત સંવેદનશીલ અને વિશ્વસનીય ઓળખ શક્ય બને છે.

ભારતમાં કેન્સર સામેની લડતમાં મહત્વપૂર્ણ પગલું

ભારતમાં દર વર્ષે અંદાજે 15 લાખથી વધુ નવા કેન્સરના કેસ નોંધાય છે. તેમાંના મોટા ભાગના દર્દીઓનું નિદાન ત્યારે થાય છે જ્યારે રોગ અદ્યતન તબક્કામાં પહોંચી ગયો હોય છે. આવી સ્થિતિમાં સારવારના વિકલ્પો મર્યાદિત રહે છે અને સફળતા પણ ઓછી રહે છે. નિષ્ણાતોના મતે, જો કેન્સરની ઓળખ પ્રારંભિક તબક્કામાં થઈ શકે તો સારવાર વધુ અસરકારક બની શકે છે અને દર્દીઓના જીવન બચાવવાની સંભાવના પણ નોંધપાત્ર રીતે વધી શકે છે.

મોટાપાયે સ્ક્રીનિંગ માટે નવી આશા

હાલમાં ઉપલબ્ધ કેન્સર સ્ક્રીનિંગ પદ્ધતિઓ માત્ર મર્યાદિત પ્રકારના કેન્સરને આવરી લે છે અને તેનો વ્યાપક અમલ કરવો સરળ નથી. જોકે સિક્વન્સિંગ ટેકનોલોજીના ખર્ચમાં સતત ઘટાડો થવાથી આ નવી પેટન્ટ ટેકનોલોજી ભવિષ્યમાં મોટા પાયે કેન્સરની વહેલી ઓળખ માટે ઉપયોગી બની શકે છે. વિશેષ ઇન્ફ્રાસ્ટ્રક્ચર વિના પણ તેનું વિસ્તૃત અમલીકરણ શક્ય બનવાની આશા વ્યક્ત કરવામાં આવી છે.

કંપનીનો દાવો અને ભવિષ્યની દિશા

સ્ટ્રેન્ડ લાઈફ સાયન્સના સીઈઓ રમેશ હરિહરે જણાવ્યું કે ભારતમાં કેન્સર જાહેર આરોગ્ય માટેનો મોટો પડકાર બની રહ્યો છે અને તેની વહેલી ઓળખ અત્યંત જરૂરી છે. તેમણે કહ્યું કે AI-સક્ષમ લિક્વિડ બાયોપ્સી ટેકનોલોજી માત્ર એક સરળ બ્લડ ટેસ્ટ દ્વારા કેન્સરની પ્રારંભિક ઓળખ કરવામાં મદદરૂપ બનશે. તેમણે ઉમેર્યું કે આ પેટન્ટ કંપનીના લિક્વિડ બાયોપ્સી ક્ષેત્રના બૌદ્ધિક સંપદા પોર્ટફોલિયોને વધુ મજબૂત બનાવશે અને પ્રિસિઝન ઓન્કોલોજી તથા અદ્યતન મોલેક્યુલર ડાયગ્નોસ્ટિક્સના વિકાસને નવી દિશા આપશે.