હીરામણિ સ્કૂલના કેમ્પસમાં ગુંજ્યા ‘જય રણછોડ’ના નારા: કે.જી. વિભાગના ભૂલકાંઓએ હોંશે-હોંશે યોજી રથયાત્રા

બાળકોમાં ધાર્મિક સંસ્કારોનું સિંચન કરવા અને સર્જનાત્મકતા ખીલવવા શિક્ષકો અને નાનકડા ભૂલકાંઓએ સાથે મળીને સુંદર રથ તૈયાર કર્યો; સમગ્ર વિશ્વની સુખાકારી માટે પ્રાર્થના કરી

અમદાવાદ:

અષાઢી બીજના પવિત્ર પર્વ અને જગતના નાથ ભગવાન જગન્નાથની ઐતિહાસિક રથયાત્રા નિમિત્તે અમદાવાદની જાણીતી હીરામણિ સ્કૂલના કે.જી. વિભાગ (ગુજરાતી અને અંગ્રેજી માધ્યમ)ના ભૂલકાંઓ દ્વારા શાળા કેમ્પસમાં જ સુંદર રથયાત્રાનું આયોજન કરવામાં આવ્યું હતું. રથયાત્રાના આ પાવન પર્વે શાળાનું વાતાવરણ ભક્તિમય અને ઉત્સાહસભર બની ગયું હતું.

શિક્ષકો અને વિદ્યાર્થીઓએ સાથે મળીને બનાવ્યો સુંદર રથ

આ આયોજન પાછળનો મુખ્ય હેતુ બાળકો શાળાકીય પ્રવૃત્તિઓ સાથે સતત જોડાયેલા રહે અને તેમની સર્જનાત્મકતા (Creativity)ને યોગ્ય પ્રોત્સાહન મળે તેવો હતો. આ હેતુને સાર્થક કરવા માટે કે.જી. વિભાગના વિદ્યાર્થીઓ અને શિક્ષકોએ સાથે મળીને કલાત્મક અને સુંદર રથ તૈયાર કર્યો હતો.

ભક્તિભાવ સાથે સમગ્ર વિશ્વની સુખાકારી માટે કરાઈ પ્રાર્થના

આ કેમ્પસ રથયાત્રામાં હીરામણિ સ્કૂલના નાના-નાના ભૂલકાંઓ અને શિક્ષકો મોટી સંખ્યામાં જોડાયા હતા. પરંપરાગત વસ્ત્રોમાં સજ્જ થયેલા બાળકોએ ભારે ઉત્સાહ અને ઉલ્લાસપૂર્વક રથ ખેંચીને ભક્તિભાવ વ્યક્ત કર્યો હતો. આ પ્રસંગે બાળકોએ ભગવાન જગન્નાથ, ભાઈ બલભદ્ર અને બહેન સુભદ્રાના ચરણોમાં વંદન કર્યા હતા. નાનકડા ભૂલકાંઓએ ભગવાન સમક્ષ સમગ્ર વિશ્વના લોકો સ્વસ્થ, સુખી અને નીરોગી રહે તેવી હૃદયપૂર્વકની પ્રાર્થના પણ કરી હતી.