AIESL અને અદાણી ડિફેન્સ સાથે કરાર; ભારતીય વાયુસેના માટે અદ્યતન એરબોર્ન અર્લી વોર્નિંગ એન્ડ કંટ્રોલ સિસ્ટમ વિકસાવવામાં આવશે
નવી દિલ્હી
ભારતની સંરક્ષણ ક્ષમતાને વધુ મજબૂત બનાવવા અને ‘આત્મનિર્ભર ભારત’ અભિયાનને વેગ આપવા માટે ડિફેન્સ રિસર્ચ એન્ડ ડેવલપમેન્ટ ઓર્ગેનાઇઝેશન (DRDO)એ AEW&C MK-II (Airborne Early Warning & Control) કાર્યક્રમ હેઠળ બે મહત્ત્વના ઔદ્યોગિક કરારો કર્યા છે. આ કરારો દ્વારા ભારતીય વાયુસેના માટે અત્યાધુનિક એરબોર્ન સર્વેલન્સ અને કમાન્ડ સિસ્ટમ વિકસાવવામાં આવશે, જે દેશની હવાઈ સુરક્ષાને વધુ સક્ષમ બનાવશે.
AIESL સાથે છ એરક્રાફ્ટના રૂપાંતર માટે કરાર
DRDOની સેન્ટર ફોર એર બોર્ન સિસ્ટમ્સ (CABS)એ AI Engineering Services Limited (AIESL), નવી દિલ્હી સાથે કરાર કર્યો છે. આ કરાર હેઠળ છ Airbus A321 વ્યાવસાયિક વિમાનોને ‘ગ્રીન કન્ફિગરેશન’માં રૂપાંતરિત કરવામાં આવશે. આ રૂપાંતર બાદ આ એરક્રાફ્ટ પર AEW&C MK-II સિસ્ટમ વિકસાવવામાં અને સ્થાપિત કરવામાં આવશે.
અદાણી ડિફેન્સ બનશે વિકાસ અને ઉત્પાદન ભાગીદાર
બીજો મહત્વપૂર્ણ કરાર અમદાવાદ સ્થિત Adani Defence Systems and Technologies Limited (ADSTL) સાથે કરવામાં આવ્યો છે. કંપનીને AEW&C MK-II કાર્યક્રમ માટે ડેવલપમેન્ટ કમ પ્રોડક્શન પાર્ટનર (DcPP) તરીકે પસંદ કરવામાં આવી છે. ADSTL મિશન સિસ્ટમ્સના વિકાસ, ઉત્પાદન અને સંકલનમાં DRDOને સહયોગ આપશે.
વાયુસેના સાથે થશે ફ્લાઇટ ટેસ્ટિંગ
CABS અને ADSTL મળીને સુધારેલા AEW&C MK-II પ્લેટફોર્મ પર મિશન સિસ્ટમ્સનું એકીકરણ કરશે. આ પ્લેટફોર્મ Airbus Defence & Space દ્વારા ઉપલબ્ધ કરાવવામાં આવશે. ત્યારબાદ ભારતીય વાયુસેના સાથે મળીને ફ્લાઇટ ટેસ્ટિંગ હાથ ધરાશે અને Centre for Military Airworthiness and Certification (CEMILAC) તથા Directorate General of Aeronautical Quality Assurance (DGAQA) પાસેથી જરૂરી પ્રમાણપત્રો મેળવવામાં આવશે.
વાયુસેનાની ક્ષમતામાં થશે મોટો વધારો
AEW&C MK-II સિસ્ટમ ભારતીય વાયુસેનાને લાંબા સમય સુધી હવાઈ દેખરેખ રાખવાની ક્ષમતા, અદ્યતન એર સર્વેલન્સ, સુરક્ષિત સંચાર વ્યવસ્થા, વધુ સારી પરિસ્થિતિની માહિતી (Situational Awareness) અને અત્યાધુનિક કમાન્ડ એન્ડ કંટ્રોલ સુવિધા પૂરી પાડશે. તેના કારણે લાંબા અંતરેથી સંભવિત હવાઈ જોખમોને ઓળખી સમયસર તેનો સામનો કરવાની ક્ષમતા નોંધપાત્ર રીતે વધશે.
આત્મનિર્ભર ભારતને મળશે પ્રોત્સાહન
DRDOએ જણાવ્યું કે ખાનગી ઉદ્યોગોને આ કાર્યક્રમમાં જોડવાથી દેશમાં સંશોધન, નવીનતા, ઉત્પાદન અને સંરક્ષણ ક્ષેત્રે સ્વદેશી ઇકોસિસ્ટમ વધુ મજબૂત બનશે. સરકારનો હેતુ અદ્યતન સંરક્ષણ ટેક્નોલોજીમાં આયાત પરની નિર્ભરતા ઘટાડીને દેશને આત્મનિર્ભર બનાવવાનો છે.
દિલ્હીમાં કરારો પર હસ્તાક્ષર
આ બંને કરારો પર 22 જુલાઈ, 2026ના રોજ નવી દિલ્હીમાં હસ્તાક્ષર કરવામાં આવ્યા હતા. આ પ્રસંગે સંરક્ષણ સચિવ તેમજ સંરક્ષણ સંશોધન અને વિકાસ વિભાગના સચિવ અને DRDOના અધ્યક્ષ રાજેશ કુમાર સિંહ ઉપસ્થિત રહ્યા હતા. CABSના ડિરેક્ટર, AIESLના CEO અને ADSTLના હેડ-એરબોર્ન પ્લેટફોર્મે કરારો પર હસ્તાક્ષર કર્યા હતા.
