નવી દિલ્હી
દિગ્ગજ ઉદ્યોગપતિ અને RPG ગ્રુપના ચેરમેન હર્ષ ગોયંકા સોશિયલ મીડિયા પર ખૂબ જ સક્રિય રહે છે. આ વખતે તેમણે સોશિયલ મીડિયા પ્લેટફોર્મ ‘એક્સ’ પર જાપાનમાં બનેલા એક અનોખા ફ્રિજ વિશે પોસ્ટ કરી છે. જાપાનમાં ભીષણ ગરમીથી નિપટવા માટે ‘હ્યુમન રેફ્રિજરેટર’ (માનવ ફ્રિજ) વેચવામાં આવી રહ્યું છે. આ એક વૉક-ઇન કૂલિંગ બૂથ છે, જે શરીરને માત્ર ૫ મિનિટમાં ઠંડુ કરી શકે છે અને તેની કિંમત આશરે ૯ લાખ રૂપિયા છે.
હર્ષ ગોયંકાએ એક્સ પર આ ફ્રિજ સાથે જોડાયેલો એક વીડિયો શેર કરતા લખ્યું, ‘જાપાને હ્યુમન ફ્રિજ લૉન્ચ કર્યું છે, જે એક પર્સનલ કૂલિંગ બૂથ છે અને તેને ઉનાળાની ભીષણ ગરમીમાં લોકોને ઠંડક પહોંચાડવા માટે બનાવવામાં આવ્યું છે. આપણે ઉનાળામાં આને રસ્તાની કિનારે લગાવવા જોઈએ.’ વીડિયોમાં બતાવવામાં આવ્યું છે કે એક યુવતી ગરમીથી બચવા માટે ફ્રિજની અંદર જાય છે, જ્યાં તેને થોડી જ વારમાં ઠંડકનો અનુભવ થવા લાગે છે.
આ ‘હ્યુમન ફ્રિજ’ની જરૂર કેમ પડી?
દુનિયાના ઘણા દેશોમાં આ વર્ષે ભયાનક ગરમી પડી રહી છે. યુરોપના ઘણા દેશો પણ ગરમીની સમસ્યાથી ઝઝૂમી રહ્યા છે. આ પરિસ્થિતિને ધ્યાનમાં રાખીને જાપાનની એક કંપની આ ‘હ્યુમન રેફ્રિજરેટર’ લઈને આવી છે. તેને ‘વૉક-ઇન કૂલિંગ બૂથ’ કહેવામાં આવી રહ્યું છે. જાપાનમાં ફ્રિજ અને વેન્ડિંગ મશીન બનાવતી કંપની SDRSએ ‘Do Hiemon Box’ વિકસિત કર્યું છે. તેને એ રીતે ડિઝાઇન કરવામાં આવ્યું છે કે તે લોકોને ભીષણ ગરમીથી તુરંત રાહત આપે છે.
આ એક નાનું રેફ્રિજરેટેડ બૂથ છે. જેમાં એક સમયે એક વ્યક્તિ આરામથી બેસી શકે છે. તેની અંદર એક ખુરશી ફીટ કરેલી છે. યૂઝરના તેમાં બેસતાની સાથે જ કૂલિંગની પ્રક્રિયા શરૂ થઈ જાય છે. કંપનીનો દાવો છે કે આ મશીનથી શરીરને ઠંડુ કરવામાં માત્ર પાંચ મિનિટનો સમય લાગે છે. આ ટેક્નોલોજી ખાસ કરીને એવા લોકો માટે ખૂબ જ ઉપયોગી છે જેઓ લાંબા સમય સુધી ખુલ્લામાં કે બહાર કામ કરે છે.
કેટલી છે આ મશીનની કિંમત?
આ મશીનના ઉપયોગથી ગંભીર હીટસ્ટ્રોક (લૂ લાગવી)ના મામલામાં ઘટાડો થઈ શકે છે. કંપનીના દાવા મુજબ, એપ્રિલમાં વેચાણ શરૂ થયા પછી જાપાનમાં ઘણી સાર્વજનિક જગ્યાઓ પર આ મશીન લગાવવામાં આવ્યું છે. આ અનોખા ‘હ્યુમન ફ્રિજ’ની કિંમત આશરે ૧૫ લાખ જાપાની યેન એટલે કે ભારતીય ચલણ મુજબ આશરે ૯ લાખ રૂપિયા છે.
