૮૦મા સ્વાતંત્ર્ય દિવસની રાજ્યકક્ષાની ઉજવણી પૂર્વે આરોગ્ય સેવાઓની વ્યવસ્થાનું સ્થળ પર નિરીક્ષણ; દર્દીઓને સમયસર અને ગુણવત્તાયુક્ત સારવાર મળે તે માટે જરૂરી સૂચનાઓ
ભરૂચ:
ભરૂચ જિલ્લામાં ૮૦મા સ્વાતંત્ર્ય દિવસની રાજ્યકક્ષાની ઉજવણી પૂર્વે રાજ્યના આરોગ્ય મંત્રી પ્રફુલ પાનશેરીયાએ મોડી રાત્રે અંકલેશ્વર ખાતે આવેલ CHC સેન્ટરની ઓચિંતી મુલાકાત લીધી હતી. રાત્રે ૧૧ વાગ્યે કરવામાં આવેલી આ મુલાકાત દરમિયાન મંત્રીએ આરોગ્ય કેન્દ્રની કામગીરી અને રાત્રિના સમયે ઉપલબ્ધ આરોગ્ય સેવાઓની જાત મુલાકાત લઈ વ્યવસ્થાઓનું નિરીક્ષણ કર્યું હતું.
તબીબી સેવાઓની મેળવી માહિતી
મોડી રાત્રે અચાનક CHC સેન્ટર ખાતે પહોંચેલા આરોગ્ય મંત્રીએ તબીબી સેવાઓ અંગે અધિકારીઓ પાસેથી વિગતવાર માહિતી મેળવી હતી. ખાસ કરીને ઈમરજન્સી સેવાઓ, દર્દીઓને આપવામાં આવતી સારવાર, જરૂરી દવાઓની ઉપલબ્ધતા તેમજ સારવાર માટે આવતા દર્દીઓને મળતી સુવિધાઓ અંગે સ્થળ પર જ જાણકારી મેળવી હતી.
ફરજ પરના સ્ટાફની કામગીરીનું નિરીક્ષણ
મંત્રીએ રાત્રિના સમયે ફરજ પર ઉપસ્થિત તબીબી અધિકારીઓ, નર્સિંગ સ્ટાફ અને અન્ય પેરામેડિકલ કર્મચારીઓ સાથે પણ વાતચીત કરી હતી. આરોગ્ય કેન્દ્રમાં રાત્રિના સમયે દર્દીઓની સંખ્યા, સારવારની પ્રક્રિયા અને જરૂરી માનવબળ અંગે પણ માહિતી મેળવી હતી. આરોગ્ય સેવાઓમાં કોઈ પ્રકારની અડચણ ન સર્જાય અને દર્દીઓને તાત્કાલિક સારવાર મળી રહે તે માટે વ્યવસ્થાઓ અંગે ચર્ચા કરવામાં આવી હતી.
‘સતત સેવા’ માટે જરૂરી માર્ગદર્શન
આરોગ્ય મંત્રીએ અધિકારીઓ અને તબીબી સ્ટાફને દિવસ-રાત નાગરિકોને સમયસર, અસરકારક અને ગુણવત્તાયુક્ત આરોગ્ય સેવા ઉપલબ્ધ રહે તે માટે જરૂરી સૂચનાઓ આપી હતી. ખાસ કરીને ઈમરજન્સી સમયે દર્દીઓને ઝડપી સારવાર મળે, દવાઓની ઉપલબ્ધતા જળવાઈ રહે અને આરોગ્ય કેન્દ્રમાં આવનાર દરેક દર્દીને યોગ્ય માર્ગદર્શન તથા સારવાર મળે તેની કાળજી રાખવા ભાર મૂકાયો હતો.
રાજ્યકક્ષાની ઉજવણી પૂર્વે આરોગ્ય વ્યવસ્થાની સમીક્ષા
ભરૂચ જિલ્લામાં ૮૦મા સ્વાતંત્ર્ય દિવસની રાજ્યકક્ષાની ઉજવણીના મહત્વપૂર્ણ પ્રસંગ પૂર્વે મંત્રી દ્વારા કરવામાં આવેલી આ ઓચિંતી મુલાકાતને આરોગ્ય સેવાઓની વાસ્તવિક સ્થિતિ જાણવા માટે મહત્વપૂર્ણ માનવામાં આવી રહી છે. માત્ર કચેરી સ્તરે માહિતી મેળવવાને બદલે મોડી રાત્રે આરોગ્ય કેન્દ્રની સ્થળ પર મુલાકાત લઈ વ્યવસ્થાઓનું નિરીક્ષણ કરવામાં આવ્યું હતું.
સંવેદનશીલ સુશાસનનો સંદેશ
આ મુલાકાત દ્વારા રાજ્ય સરકારની ‘સતત સેવા, સંવેદનશીલ સુશાસન’ની પ્રતિબદ્ધતાનો સંદેશ પણ સ્પષ્ટ થયો છે. જાહેર આરોગ્ય સેવાઓમાં ગુણવત્તા જળવાઈ રહે અને સામાન્ય નાગરિકને કોઈપણ સમયે સારવાર મેળવવામાં મુશ્કેલી ન પડે તે માટે સરકારના જવાબદાર તંત્ર દ્વારા સતત દેખરેખ રાખવામાં આવી રહી છે. આરોગ્ય મંત્રીની આ ઓચિંતી મુલાકાતથી રાત્રિના સમયે પણ આરોગ્ય સેવાઓની કામગીરી અંગે જવાબદારી અને સતર્કતાનો સંદેશ આપવામાં આવ્યો છે.
