VIMARSH-2026માં 9 ટેક્નોલોજી ટ્રાન્સફર કરાર 13 મેન્યુફેક્ચરિંગ ભાગીદારોને સોંપાયા; DRDO સોફ્ટવેરના સોર્સ કોડ શેરિંગ માટે સુરક્ષિત ફ્રેમવર્ક લોન્ચ
નવી દિલ્હી
રક્ષા મંત્રી રાજનાથ સિંહે નવી દિલ્હીમાં યોજાયેલા ‘VIMARSH’ DRDO-ઇન્ડસ્ટ્રી સિનર્જી મીટ દરમિયાન MSME અને ડીપ-ટેક સ્ટાર્ટઅપ્સને સંરક્ષણ ક્ષેત્રમાં વધુ સક્રિય બનાવવા માટે મહત્વપૂર્ણ નીતિ પહેલોની જાહેરાત કરી હતી. નવી પહેલો હેઠળ ટેક્નિકલ અને નાણાકીય પ્રવેશ અવરોધ ઘટાડવા, સીધું ફંડિંગ, ઇન્ક્યુબેશન સહાય અને DRDOની ટેસ્ટિંગ સુવિધાઓ સુધી વિશેષ પહોંચ આપવામાં આવશે. સાથે જ DRDO દ્વારા વિકસિત સોફ્ટવેરના સોર્સ કોડ લાઇસન્સધારક ઉદ્યોગોને સુરક્ષિત અને પ્રમાણિત રીતે ઉપલબ્ધ કરાવવા માટેનું ફ્રેમવર્ક પણ લોન્ચ કરાયું છે.
13 મેન્યુફેક્ચરિંગ ભાગીદારોને 9 ટેક્નોલોજી ટ્રાન્સફર કરાર
કાર્યક્રમ દરમિયાન 9 લાઇસન્સિંગ એગ્રીમેન્ટ્સ ફોર ટ્રાન્સફર ઑફ ટેક્નોલોજી (LAToTs) 13 મેન્યુફેક્ચરિંગ ભાગીદારોને સોંપવામાં આવ્યા હતા. આ કરારોના માધ્યમથી અદ્યતન સંરક્ષણ પ્રણાલીઓનું વ્યાવસાયિક ઉત્પાદન શરૂ કરવામાં મદદ મળશે. ઉદ્યોગોની વ્યાપક ભાગીદારી સુનિશ્ચિત કરવા માટે સોસાયટી ઑફ ઇન્ડિયન ડિફેન્સ મેન્યુફેક્ચરર્સ (SIDM) અને લઘુ ઉદ્યોગ ભારતી (LUB) સાથે વ્યૂહાત્મક એમઓયુનું પણ આદાનપ્રદાન થયું હતું.
SAMAR 2.0થી મેન્યુફેક્ચરિંગ ક્ષમતાનું મૂલ્યાંકન
DRDOએ ક્વોલિટી કાઉન્સિલ ઑફ ઇન્ડિયા સાથે System for Advance Manufacturing Assessment and Rating (SAMAR)ના વર્ઝન 2.0 માટે કરાર કર્યો છે. આ વ્યવસ્થા દેશની સ્થાનિક સંરક્ષણ કંપનીઓની મેન્યુફેક્ચરિંગ પરિપક્વતાનું મૂલ્યાંકન અને બેન્ચમાર્કિંગ કરવામાં મદદ કરશે.
સંરક્ષણ ક્ષેત્રમાં MSME અને સ્ટાર્ટઅપ્સની ભૂમિકા વધારવા ભાર
રાજનાથ સિંહે જણાવ્યું કે DRDO અને ઉદ્યોગ વચ્ચેનો સહયોગ માત્ર ઉત્પાદન પૂરતો મર્યાદિત ન રહેવો જોઈએ. સંશોધન, ડિઝાઇન, ટેસ્ટિંગ, સર્ટિફિકેશન અને મેન્યુફેક્ચરિંગ સહિત સમગ્ર વેલ્યુ ચેઇનમાં સહયોગ વધારવાની જરૂર છે. DRDO પાસે જ્ઞાન અને ટેક્નોલોજી, ઉદ્યોગ પાસે ઉત્પાદન ક્ષમતા અને સ્ટાર્ટઅપ્સ પાસે નવીનતા તથા ઝડપ છે. આ શક્તિઓના સંકલનથી ભારતને સંરક્ષણ ઉત્પાદનનું વૈશ્વિક કેન્દ્ર બનાવી શકાય છે.
2047 સુધી ટેક્નોલોજીમાં આત્મનિર્ભરતા લક્ષ્ય
રક્ષામંત્રીએ કહ્યું કે ‘વિકસિત ભારત’નો હેતુ માત્ર આર્થિક રીતે મજબૂત દેશ બનાવવાનો નથી, પરંતુ ટેક્નોલોજીની દૃષ્ટિએ આત્મનિર્ભર, સામાજિક રીતે સમાવેશી, પર્યાવરણની દૃષ્ટિએ ટકાઉ અને વ્યૂહાત્મક રીતે સુરક્ષિત રાષ્ટ્રનું નિર્માણ કરવાનો છે. 2047 સુધી મહત્વપૂર્ણ ટેક્નોલોજીમાં આત્મનિર્ભરતા, સ્વદેશી સામગ્રીમાં નોંધપાત્ર વધારો, સંરક્ષણ નિકાસમાં અનેકગણો વધારો અને વૈશ્વિક સપ્લાય ચેઇનમાં ભારતની મજબૂત હાજરીનું લક્ષ્ય છે.
2,300થી વધુ ટેક્નોલોજી ટ્રાન્સફર ઉદ્યોગોને મળ્યા
રક્ષા સચિવ અને DRDOના અધ્યક્ષ રાજેશ કુમાર સિંહે જણાવ્યું કે અત્યાર સુધી 2,300થી વધુ ટેક્નોલોજી ટ્રાન્સફર 1,100થી વધુ ઉદ્યોગોને સોંપવામાં આવ્યા છે. DRDO દ્વારા વિકસિત આશરે 50 મિસાઇલ સંબંધિત ટેક્નોલોજી પણ ઉદ્યોગો માટે ઉપલબ્ધ કરાવવામાં આવી છે. આથી સંરક્ષણ દળોની જરૂરિયાતો પૂરી કરવા સમાંતર ઉત્પાદન લાઇનો ઊભી થવા સાથે MSME ક્ષેત્રને પણ લાભ મળ્યો છે.
AI, ક્વોન્ટમ કમ્પ્યુટિંગ અને હાઇપરસોનિક્સ પર ધ્યાન
નવી નીતિ પહેલોમાં ઇન્ડસ્ટ્રી-લેડ R&D, MSME અને સ્ટાર્ટઅપ્સ માટે ફંડિંગ તથા મેન્ટરશિપ, એકેડેમિયા-ઇન્ડસ્ટ્રી સહયોગ અને AI, ક્વોન્ટમ કમ્પ્યુટિંગ, હાઇપરસોનિક્સ તથા ડાયરેક્ટેડ એનર્જી જેવી ભવિષ્યની ટેક્નોલોજીમાં રોકાણને પ્રોત્સાહન આપવાનો સમાવેશ થાય છે. VIMARSH-2026માં 250થી વધુ સંરક્ષણ ઉદ્યોગ અગ્રણીઓ, ઉદ્યોગ મંડળોના પ્રતિનિધિઓ, વરિષ્ઠ નાગરિક-લશ્કરી અધિકારીઓ અને DRDOના વૈજ્ઞાનિકોએ ભાગ લીધો હતો.
