પી.પી. સવાણી હોસ્ટેલની ફૂડ પોઈઝનિંગ ઘટનાના પગલે આરોગ્ય વિભાગ સક્રિય; 11 ખાદ્ય નમૂના લેવાયા, 4 હોસ્ટેલ-કેન્ટીન સ્વયંભૂ બંધ
ગાંધીનગર
સુરતની પી.પી. સવાણી હોસ્ટેલમાં તાજેતરમાં બનેલી ફૂડ પોઈઝનિંગની ઘટનાને રાજ્ય સરકારે ગંભીરતાથી લીધી છે. વિદ્યાર્થીઓ અને નાગરિકોના આરોગ્યની સુરક્ષાને સર્વોચ્ચ પ્રાથમિકતા આપતા આરોગ્ય મંત્રી પ્રફુલ પાનશેરીયાએ રાજ્યભરમાં હોસ્ટેલ અને કેન્ટીનની સઘન તપાસ હાથ ધરવા ખોરાક અને ઔષધ નિયંત્રણ તંત્રને તાત્કાલિક સૂચના આપી હતી. આ સૂચનાના પગલે 15 સપ્ટેમ્બરના રોજ રાજ્યવ્યાપી સ્પેશિયલ ડ્રાઈવ હાથ ધરવામાં આવી હતી.
128 હોસ્ટેલ અને કેન્ટીનની તપાસ
ખોરાક અને ઔષધ નિયંત્રણ તંત્ર દ્વારા હાથ ધરાયેલી આ વિશેષ તપાસમાં સાંજે 6 વાગ્યા સુધીમાં રાજ્યભરમાં કુલ 128 હોસ્ટેલ અને કેન્ટીનની તપાસ કરવામાં આવી હતી. તેમાં 25 સરકારી, 35 અર્ધસરકારી અને 68 ખાનગી હોસ્ટેલ તથા કેન્ટીનનો સમાવેશ થાય છે. તપાસનો મુખ્ય હેતુ વિદ્યાર્થીઓ અને અન્ય નાગરિકોને આપવામાં આવતા ખોરાકની સ્વચ્છતા, ગુણવત્તા તથા ખાદ્ય સુરક્ષાના ધોરણોનું પાલન થાય છે કે નહીં તે ચકાસવાનો હતો.
38 સ્થળોને ઇમ્પ્રુવમેન્ટ નોટિસ
તપાસ દરમિયાન જ્યાં સ્વચ્છતા, ખાદ્ય સુરક્ષા અથવા ગુણવત્તા સંબંધિત ખામીઓ જોવા મળી હતી, ત્યાં સંચાલકો સામે જરૂરી કાર્યવાહી હાથ ધરવામાં આવી હતી. કુલ 38 હોસ્ટેલ અને કેન્ટીનને ઇમ્પ્રુવમેન્ટ નોટિસ આપવામાં આવી છે. આ નોટિસ મારફતે સંચાલકોને જોવા મળેલી ખામીઓમાં જરૂરી સુધારા કરવા અને ખાદ્ય સુરક્ષા તથા સ્વચ્છતાના ધોરણોનું પાલન સુનિશ્ચિત કરવા સૂચના આપવામાં આવી છે.
11 ખાદ્ય નમૂનાઓ લેવામાં આવ્યા
તપાસ દરમિયાન ખાદ્ય પદાર્થોની ગુણવત્તા ચકાસવા માટે કુલ 11 ખાદ્ય નમૂનાઓ લેવામાં આવ્યા છે. આ નમૂનાઓનું વધુ પરીક્ષણ અને વિશ્લેષણ કરવામાં આવશે. તપાસના પરિણામો અને વિશ્લેષણના આધારે જરૂરી હોય ત્યાં કાયદેસરની કાર્યવાહી હાથ ધરવામાં આવશે.
ગંભીર અસ્વચ્છતા સામે કડક કાર્યવાહી
તપાસ દરમિયાન ગંભીર અસ્વચ્છતા અને અનહાઇજેનિક પરિસ્થિતિ જોવા મળતા 4 હોસ્ટેલ અને કેન્ટીન સ્વયંભૂ બંધ થઈ ગયા હતા. આ કાર્યવાહી એ દર્શાવે છે કે ખાદ્ય વ્યવસ્થામાં સ્વચ્છતા અને સુરક્ષાના ધોરણોનું પાલન નહીં થાય તો તંત્ર દ્વારા કડક પગલાં લેવામાં આવી શકે છે.
જાહેર આરોગ્ય સાથે ચેડાં સામે કાર્યવાહી ચાલુ રહેશે
ખોરાક અને ઔષધ નિયંત્રણ તંત્રે સ્પષ્ટ કર્યું છે કે રાજ્યના નાગરિકોના સ્વાસ્થ્ય અને સુરક્ષા માટે તંત્ર સંપૂર્ણપણે પ્રતિબદ્ધ છે. જાહેર આરોગ્ય સાથે ચેડાં કરનાર, ભેળસેળ કરનાર તથા કાયદા વિરુદ્ધ પ્રવૃત્તિઓમાં સંકળાયેલા તત્વો સામે આગામી સમયમાં પણ સઘન અને કડક કાયદેસરની કાર્યવાહી ચાલુ રાખવામાં આવશે.
રાજ્ય સરકાર દ્વારા હોસ્ટેલ, કેન્ટીન સહિત ખાદ્ય વ્યવસ્થામાં સ્વચ્છતા અને ખાદ્ય સુરક્ષાના ધોરણોનું કડક પાલન થાય તે માટે સતત દેખરેખ રાખવામાં આવી રહી છે. વિદ્યાર્થીઓ અને નાગરિકોને સુરક્ષિત, સ્વચ્છ તથા ગુણવત્તાયુક્ત ખોરાક મળી રહે તે માટે તંત્ર સતર્ક હોવાનું જણાવાયું છે.
