જુનાગઢ રનર-અપ અને ગાંધીનગર સેકન્ડ રનર-અપ; અંતિમ મુકાબલામાં જુનાગઢે ગાંધીનગરને 1-0થી હરાવ્યું
ગાંધીનગર:
ગુજરાત સ્ટેટ ફૂટબોલ એસોસિએશન દ્વારા આયોજિત રિલાયન્સ કપ સિનિયર મેન્સ ઇન્ટર-ડિસ્ટ્રિક્ટ ફૂટબોલ ટુર્નામેન્ટ-2026માં બરોડાની ટીમે ચેમ્પિયનશિપ પોતાના નામે કરી છે. સુપર લીગ સ્ટેજમાં બરોડાની ટીમે ગાંધીનગર અને જુનાગઢની ટીમોને હરાવીને પ્રથમ સ્થાન મેળવ્યું હતું. જ્યારે જુનાગઢની ટીમ રનર-અપ અને ગાંધીનગરની ટીમ સેકન્ડ રનર-અપ રહી હતી.
ગાંધીનગર ખાતે રમાયેલી ટુર્નામેન્ટની અંતિમ મેચમાં જુનાગઢ અને ગાંધીનગરની ટીમ વચ્ચે શરૂઆતથી જ રોમાંચક મુકાબલો જોવા મળ્યો હતો. બંને ટીમોએ બોલ પઝેશન જાળવીને આક્રમક રમત કરવાનો પ્રયાસ કર્યો હતો. જોકે, પ્રથમ હાફમાં બંને ટીમમાંથી કોઈપણ ટીમ ગોલ કરી શકી નહોતી અને સ્કોર 0-0 રહ્યો હતો.
બીજા હાફમાં જુનાગઢે વધુ આક્રમક રમત શરૂ કરી હતી. મેચની 78મી મિનિટે જુનાગઢના કેપ્ટન કાવ્ય ચૌહાણે લેફ્ટ વિંગ પરથી ગાંધીનગરના ડિફેન્ડરને બીટ કરીને સુંદર પ્લેસમેન્ટ સાથે ગોલ કર્યો હતો. આ ગોલ સાથે જુનાગઢે 1-0ની સરસાઈ મેળવી હતી. મેચના અંત સુધી ગાંધીનગરની ટીમ બરાબરીનો ગોલ કરી શકી નહોતી અને આખરે જુનાગઢે 1-0થી વિજય મેળવ્યો હતો.
ટુર્નામેન્ટ પૂર્ણ થયા બાદ ચેમ્પિયન બનેલી બરોડાની ટીમને ટ્રોફી અને મેડલ એનાયત કરવામાં આવ્યા હતા. રનર-અપ જુનાગઢની ટીમના ખેલાડીઓને પણ મેડલ આપવામાં આવ્યા હતા. સ્ટેટ ફૂટબોલ એસોસિએશનના હોદ્દેદારો નિતિન ભટ્ટ, નટુ સિસોદિયા, જતિન ભાવસાર અને ડી.એ. ગાંધીના હસ્તે વિજેતા અને ઉપવિજેતા ટીમોને પુરસ્કારો એનાયત કરવામાં આવ્યા હતા.
આ સમગ્ર ટુર્નામેન્ટ દરમિયાન ગુજરાતની નેશનલ ટીમના કેમ્પ માટે ખેલાડીઓની પસંદગી પ્રક્રિયા પણ હાથ ધરવામાં આવી હતી. સિલેક્ટરો દ્વારા 30 ખેલાડીઓની પસંદગી કરવામાં આવી છે, જ્યારે 5 ખેલાડીઓને સ્ટેન્ડબાય તરીકે પસંદ કરવામાં આવ્યા છે. આ ખેલાડીઓ આગામી નેશનલ ટીમ કેમ્પમાં ગુજરાતનું પ્રતિનિધિત્વ કરવા માટે દાવેદારી નોંધાવશે.
રિલાયન્સ કપ-2026
- 🏆 ચેમ્પિયન: બરોડા
- 🥈 રનર-અપ: જુનાગઢ
- 🥉 સેકન્ડ રનર-અપ: ગાંધીનગર
- ⚽ અંતિમ મેચ: જુનાગઢ 1-0 ગાંધીનગર
- 👤 વિજેતા ગોલ: કાવ્ય ચૌહાણ – 78મી મિનિટ
- 🇮🇳 ગુજરાત નેશનલ ટીમ કેમ્પ: 30 ખેલાડીઓ પસંદ, 5 સ્ટેન્ડબાય
