‘વેલકમ ટુ ધ જંગલ’થી લઈને ‘સુપરગર્લ’ સુધી, કોમેડી, એક્શન અને ફેમિલી ડ્રામાનો મળશે ભરપૂર ડોઝ
મુંબઈ:
જૂન મહિનાના અંતિમ સપ્તાહમાં સિનેપ્રેમીઓ માટે મનોરંજનનો મોટો ડોઝ તૈયાર છે. આગામી 26 જૂન, શુક્રવારે દેશભરના સિનેમાઘરોમાં પાંચ નવી ફિલ્મો રિલીઝ થવા જઈ રહી છે. તેમાં હિન્દી ફિલ્મપ્રેમીઓ માટે સૌથી મોટી આકર્ષણ વેલકમ ટૂ ધ જંગલ છે, જ્યારે હોલિવૂડના ચાહકો માટે સુપરગર્લ મોટા પડદા પર ધમાકેદાર એન્ટ્રી કરવા જઈ રહી છે. આ ઉપરાંત ફેમિલી ડ્રામા, કોમેડી અને સ્ટંટ આધારિત ફિલ્મો પણ દર્શકોનું મનોરંજન કરવા તૈયાર છે.
‘વેલકમ ટુ ધ જંગલ’માં 30થી વધુ કલાકારોનો મેળાવડો
અભિનેતા અક્ષય કુમાર અભિનીત ‘વેલકમ ટુ ધ જંગલ’ લોકપ્રિય ‘વેલકમ’ ફ્રેન્ચાઇઝીની ત્રીજી ફિલ્મ છે. નિર્દેશક અહેમદ ખાન દ્વારા બનાવાયેલી આ ફિલ્મમાં 30થી વધુ કલાકારોનો વિશાળ સમૂહ જોવા મળશે. ફિલ્મમાં એક સંઘર્ષરત અભિનેતાની વાર્તા છે, જે ફિલ્મના શૂટિંગ માટે સરહદી ગામમાં પહોંચે છે અને ત્યાંથી હાસ્યાસ્પદ ગૂંચવણો શરૂ થાય છે.
DC યુનિવર્સની ‘સુપરગર્લ’ પર ચાહકોની નજર
DC યુનિવર્સની નવી સુપરહીરો ફિલ્મ ‘સુપરગર્લ’ પણ આ અઠવાડિયે રિલીઝ થશે. ફિલ્મમાં કારા ઝોર-એલના જીવનની ભાવનાત્મક અને સાહસિક સફર દર્શાવવામાં આવી છે. પોતાના ગ્રહના વિનાશની યાદો સાથે જીવતી સુપરગર્લ એક યુવતીની મદદ માટે ખતરનાક મિશન પર નીકળે છે. સુપરહીરો ફિલ્મોના ચાહકો માટે આ ફિલ્મ ખાસ આકર્ષણ બની શકે છે.
પરિવારિક સંબંધોની વાત કરશે ‘તેરા મેરા નાતા’
તેરા મેરા નાતા એક લાગણીસભર ફેમિલી ડ્રામા છે. પ્રેમ, સંબંધો અને પરિવારના મૂલ્યો પર આધારિત આ ફિલ્મમાં દિપીકા ચિખલિયા મહત્વની ભૂમિકામાં જોવા મળશે. ફિલ્મનું પ્રીમિયર 79મા કાન્સ ફિલ્મ ફેસ્ટિવલમાં થઈ ચૂક્યું છે.
હોલિવૂડમાંથી બે વધુ ફિલ્મો
ધ ઈનવાઈટ એક મેરિટલ ડ્રામા અને કોમેડી છે, જેમાં એક દંપતીના જીવનમાં પડોશીઓના આગમન પછી સર્જાતી રસપ્રદ ઘટનાઓ દર્શાવવામાં આવી છે. બીજી તરફ જેક્એસ: બેસ્ટ એન્ડ લાસ્ટ લોકપ્રિય ‘જેકએસ’ શ્રેણીની અંતિમ ફિલ્મ છે, જેમાં ખતરનાક સ્ટંટ અને મસ્તીભર્યા પ્રેન્ક્સનો જબરદસ્ત મસાલો જોવા મળશે.
દરેક વર્ગના દર્શકો માટે વિકલ્પ
આ અઠવાડિયે રિલીઝ થનારી ફિલ્મોમાં કોમેડી, સુપરહીરો એક્શન, પરિવારિક લાગણીઓ અને એડવેન્ચરનો સમન્વય જોવા મળશે. પરિણામે સિનેપ્રેમીઓ માટે પોતાની પસંદગી મુજબ મનોરંજન માણવાનો ઉત્તમ અવસર સર્જાયો છે.
