ફાઇનલમાં અમદાવાદ એવેન્જર્સને 3-1થી હરાવી સૌરાષ્ટ્ર સ્પાર્ટન્સે ખિતાબ જીત્યો; મુકેશ વર્માના બે ગોલથી ટીમની શાનદાર જીત
અમદાવાદ
ગુજરાત સ્ટેટ ફૂટબોલ એસોસિએશન (GSFA) દ્વારા આયોજિત ગુજરાત સુપર લીગ-3નો ફાઇનલ મુકાબલો અમદાવાદના એકા એરેના ફૂટબોલ ગ્રાઉન્ડ, ટ્રાન્સસ્ટેડિયા ખાતે સૌરાષ્ટ્ર સ્પાર્ટન્સ અને અમદાવાદ એવેન્જર્સ વચ્ચે રમાયો હતો. ધીમા ધીમા વરસતા રિમઝિમ વરસાદ વચ્ચે રમાયેલી આ રોમાંચક ફાઇનલમાં સૌરાષ્ટ્ર સ્પાર્ટન્સે શાનદાર પ્રદર્શન કરતાં અમદાવાદ એવેન્જર્સને 3-1થી હરાવીને ગુજરાત સુપર લીગ-3નો ચેમ્પિયન ખિતાબ પોતાના નામે કર્યો હતો.
શરૂઆતથી જ બંને ટીમો વચ્ચે જોરદાર મુકાબલો
મેચની શરૂઆતથી જ બંને ટીમોના ખેલાડીઓએ ઝડપી રમતનું પ્રદર્શન કર્યું હતું. વરસાદને કારણે ગ્રાઉન્ડ સ્લીપી હોવાથી બોલ પર નિયંત્રણ મેળવવું બંને ટીમો માટે પડકારજનક બન્યું હતું. તેમ છતાં બંને ટીમોએ આક્રમક રમત જાળવી રાખી હતી અને ગોલ માટે સતત પ્રયાસો કર્યા હતા.
મેચની 9મી મિનિટે સૌરાષ્ટ્ર સ્પાર્ટન્સને પ્રથમ સફળતા મળી હતી. ટીમના મુકેશ વર્માએ શાનદાર રીતે બોલને નિયંત્રણમાં લઈ ડિફેન્ડરને બીટ કર્યો હતો અને સુંદર પ્લેસિંગ સાથે ગોલ ફટકારી ટીમને 1-0ની સરસાઈ અપાવી હતી. આ ગોલ બાદ અમદાવાદ એવેન્જર્સે વળતો હુમલો કરીને બરાબરીનો ગોલ કરવાનો પ્રયાસ કર્યો હતો, પરંતુ સૌરાષ્ટ્રની રક્ષણાત્મક પંક્તિ અને ગોલકીપર સામે તેને સફળતા મળી નહોતી.
પેનલ્ટીથી સૌરાષ્ટ્રની સરસાઈ 2-0 થઈ
મેચની 25મી મિનિટે સૌરાષ્ટ્ર સ્પાર્ટન્સને પેનલ્ટી મળી હતી. ટીમના હાફિઝ ખાને પેનલ્ટીને ગોલમાં ફેરવીને સૌરાષ્ટ્રની લીડ 2-0 કરી હતી. ત્યારબાદ બાકીના પ્રથમ હાફમાં બંને ટીમોએ ગોલ માટે પ્રયાસો કર્યા હતા, પરંતુ વધુ ગોલ નોંધાયો નહોતો. પ્રથમ હાફનો અંત સૌરાષ્ટ્ર સ્પાર્ટન્સની 2-0ની સરસાઈ સાથે થયો હતો.
અમદાવાદે વાપસીનો પ્રયાસ કર્યો
બીજા હાફની શરૂઆતથી અમદાવાદ એવેન્જર્સે આક્રમક રમત સાથે મેચમાં વાપસી કરવાનો પ્રયાસ કર્યો હતો. સતત હુમલાઓના પરિણામે 49મી મિનિટે અમદાવાદ એવેન્જર્સને પેનલ્ટી મળી હતી. સૌરાષ્ટ્રના ગોલકીપર સુભમે અમદાવાદના ખેલાડીને રોકવાના પ્રયાસ દરમિયાન ફાઉલ કરતાં રેફરી જાર્વીશે પેનલ્ટી આપી હતી. અમદાવાદ એવેન્જર્સના બસીત અહેમદે પેનલ્ટીને સફળતાપૂર્વક ગોલમાં પરિવર્તિત કરી સ્કોર 2-1 કર્યો હતો.
મુકેશ વર્માના બીજા ગોલથી ખિતાબ નિશ્ચિત
અમદાવાદ એવેન્જર્સે બરાબરી માટે સતત પ્રયાસો કર્યા હતા, પરંતુ સૌરાષ્ટ્ર સ્પાર્ટન્સે રક્ષણ મજબૂત રાખ્યું હતું. દરમિયાન મેચની 69મી મિનિટે મુકેશ વર્માએ શાનદાર લેફ્ટ-ફૂટ શોટ દ્વારા પોતાનો બીજો અને ટીમનો ત્રીજો ગોલ નોંધાવ્યો હતો. આ ગોલ સાથે સૌરાષ્ટ્ર સ્પાર્ટન્સે 3-1ની મજબૂત સરસાઈ મેળવી હતી. અંત સુધી અમદાવાદ એવેન્જર્સ કોઈ વધુ ગોલ કરી શક્યું નહોતું અને ફાઇનલનો અંત 3-1ના સ્કોર સાથે થયો હતો.
ચેમ્પિયનને રૂ. 11 લાખનું ઇનામ
ગુજરાત સુપર લીગ-3નો ખિતાબ જીતનાર સૌરાષ્ટ્ર સ્પાર્ટન્સને રૂ. 11 લાખ અને રનર-અપ અમદાવાદ એવેન્જર્સને રૂ. 5 લાખની પ્રાઇઝ મનીનો ચેક મુકેશ પૂરી અને મનોજકુમાર દાસના હસ્તે એનાયત કરવામાં આવ્યો હતો.
ટુર્નામેન્ટમાં વિવિધ કેટેગરીમાં શ્રેષ્ઠ પ્રદર્શન કરનાર ખેલાડીઓને પણ સન્માનિત કરવામાં આવ્યા હતા. બેસ્ટ ગોલકીપર તરીકે સત્યજિત, બેસ્ટ ડિફેન્ડર તરીકે રુદ્ર ક્ષેત્રી, બેસ્ટ મિડફિલ્ડર તરીકે હાફિઝ ખાન, ઈમર્જિંગ પ્લેયર તરીકે મીખાઈલ, બેસ્ટ સ્કોરર તરીકે મુકેશ વર્મા અને બેસ્ટ કોચ તરીકે બાલપ્રિતસિંહની પસંદગી કરવામાં આવી હતી. આ ઉપરાંત ફેર ટીમનો એવોર્ડ પણ આપવામાં આવ્યો હતો.
મેચ સમરી
| ટીમ | ગોલ |
|---|---|
| સૌરાષ્ટ્ર સ્પાર્ટન્સ | 3 |
| અમદાવાદ એવેન્જર્સ | 1 |
ગોલ સ્કોરર:
સૌરાષ્ટ્ર સ્પાર્ટન્સ – મુકેશ વર્મા (9મી, 69મી મિનિટ), હાફિઝ ખાન (25મી મિનિટ)
અમદાવાદ એવેન્જર્સ – બસીત અહેમદ (49મી મિનિટ)
