EMEના 12 બાઇકસવારો 1,250 કિમીનો પ્રવાસ ખેડશે, યુવાનોને સૈન્યના ટેકનોલોજીકલ પરિવર્તન અને કારકિર્દી અંગે કરશે જાગૃત
અમદાવાદ
ભારતીય સૈન્યના કોર્પ્સ ઓફ ઇલેક્ટ્રોનિક્સ એન્ડ મિકેનિકલ એન્જિનિયર્સ (EME) દ્વારા યુવાનો સાથે જોડાણ વધારવા અને સૈન્યમાં ચાલી રહેલા ટેકનોલોજીકલ પરિવર્તનને લોકો સમક્ષ રજૂ કરવાના ઉદ્દેશ્યથી ‘રાઇડ વિથ પ્રાઇડ – EME ટુવર્ડ્સ ટેક્નોલોજીકલ ટ્રાન્સફોર્મેશન’ નામના મોટરસાઇકલ અભિયાનનું આયોજન કરવામાં આવ્યું છે. આ અભિયાનને 5 ઓક્ટોબર 2026ના રોજ વડોદરા સ્થિત EME સ્કૂલ ખાતેથી EME સ્કૂલના કમાન્ડન્ટ મેજર જનરલ મોહિત ગાંધી દ્વારા લીલી ઝંડી આપવામાં આવી હતી.
વડોદરાથી શરૂ થયેલી 1,250 કિમીની સફર
આ અભિયાનમાં કોર્પ્સ ઓફ EMEના 12 બાઇકસવારોની ઉત્સાહી ટીમ ભાગ લઈ રહી છે. ટીમ વડોદરાથી પ્રસ્થાન કર્યા બાદ અમદાવાદ, ઉદયપુર, જોધપુર અને જયપુર થઈને આશરે 1,250 કિલોમીટરનું અંતર કાપશે અને અંતે નવી દિલ્હીમાં અભિયાનનું સમાપન કરશે. અભિયાન દરમિયાન વિવિધ શહેરો અને સ્થળોએ યુવાનો સાથે સંવાદ તથા જાગૃતિ કાર્યક્રમો યોજાશે.
સૈન્યના ટેકનોલોજીકલ પરિવર્તનની માહિતી આપશે
‘રાઇડ વિથ પ્રાઇડ’ અભિયાનનો મુખ્ય ઉદ્દેશ્ય ભારતીય સૈન્યમાં થઈ રહેલા ટેકનોલોજીકલ પરિવર્તનને યુવાનો સુધી પહોંચાડવાનો છે. અભિયાનમાં જોડાયેલા બાઇકસવારો ભારતીય સૈન્યના સાધનો અને વિવિધ સિસ્ટમોની જાળવણી તથા આધુનિકીકરણમાં કોર્પ્સ ઓફ EMEની મહત્વપૂર્ણ ભૂમિકા અંગે લોકોને માહિતગાર કરશે.
આ ઉપરાંત સંવાદ કાર્યક્રમો દ્વારા યુવાનોને સશસ્ત્ર દળોમાં ઉપલબ્ધ કારકિર્દીની તકો અંગે પણ માહિતગાર કરવામાં આવશે. ભારતીય યુવાનોને સૈન્યમાં કારકિર્દી બનાવવા માટે પ્રોત્સાહિત કરવાનો પણ આ અભિયાનનો મહત્વપૂર્ણ હેતુ છે.
નવીનતા અને ટેકનોલોજી પર ભાર
કોર્પ્સ ઓફ EME ભારતીય સૈન્યની ટેકનોલોજીકલ ક્ષમતાને વધુ મજબૂત બનાવવામાં મહત્વપૂર્ણ ભૂમિકા ભજવે છે. ‘રાઇડ વિથ પ્રાઇડ’ પહેલ દ્વારા નવીનતા, વ્યાવસાયિક કૌશલ્ય અને જનસંપર્ક પ્રત્યે EMEની પ્રતિબદ્ધતાને ઉજાગર કરવામાં આવી રહી છે. આ અભિયાન ભારતીય સૈન્યને વધુ આધુનિક, ટેકનોલોજી આધારિત અને આત્મનિર્ભર બનાવવાના વ્યાપક પ્રયાસો સાથે જોડાયેલું છે.
