૪૩,૫૦૦ ટનના ફલીટ સપોર્ટ શિપ્સ ભારતીય નૌકાદળની દરિયાઈ ક્ષમતા અને પહોંચ વધારશે; 300 ટનના ગોલિયાથ ક્રેનથી મોટા જહાજોના નિર્માણને મળશે વેગ
વિશાખાપટ્ટનમ
ભારતની સ્વદેશી જહાજ નિર્માણ ક્ષમતાને વધુ મજબૂત બનાવતી મહત્વપૂર્ણ પહેલરૂપે કેન્દ્રીય સંરક્ષણ મંત્રી રાજનાથ સિંહ 6 ઓક્ટોબર, 2026ના રોજ વિશાખાપટ્ટનમ સ્થિત હિન્દુસ્તાન શિપયાર્ડ લિમિટેડ ખાતે ફલીટ સપોર્ટ શિપ-1 (FSS-1)નું લોન્ચિંગ કરશે. આ ઉપરાંત તેઓ ફલીટ સપોર્ટ શિપ-5 (FSS-5)ની કીલ લેઇંગ તેમજ અપગ્રેડ કરાયેલા સ્લિપવે-4 અને 300 ટન ક્ષમતાવાળા ગોલિયાથ ક્રેનનું ઉદ્ઘાટન પણ કરશે.
મોટા અને જટિલ જહાજોના નિર્માણની ક્ષમતા વધશે
હિન્દુસ્તાન શિપયાર્ડ લિમિટેડ ખાતે અપગ્રેડ કરવામાં આવેલા સ્લિપવે-4ની લંબાઈ વધારવામાં આવી છે અને તેની ભાર વહન કરવાની ક્ષમતામાં પણ વધારો કરવામાં આવ્યો છે. 300 ટન ક્ષમતાવાળા ગોલિયાથ ક્રેનના સહયોગથી આ સુવિધા શિપયાર્ડને 45,000 ડેડવેઇટ ટન (DWT) સુધીના જહાજોના નિર્માણ અને લોન્ચિંગ માટે સક્ષમ બનાવશે.
આ નવી ક્ષમતાથી શિપયાર્ડ મોટા કદના તેમજ વધુ જટિલ નૌકાદળના પ્લેટફોર્મ અને જહાજોના નિર્માણના ઓર્ડર હાથ ધરવા માટે વધુ સક્ષમ બનશે. તેનાથી દેશમાં સ્વદેશી જહાજ નિર્માણની ક્ષમતાને પણ વધુ વેગ મળવાની અપેક્ષા છે.
FSS-1 માત્ર 18 મહિનામાં તૈયાર
FSS-1 ભારતીય નૌકાદળ માટે બનાવવામાં આવી રહેલા પાંચ ફલીટ સપોર્ટ શિપ્સમાંથી પ્રથમ છે. સ્ટીલ કટિંગ થયા બાદ માત્ર 18 મહિનામાં તેને બંગાળની ખાડીના જળમાં લોન્ચ કરવામાં આવશે.
આ ફલીટ સપોર્ટ શિપ્સનું વજન 43,500 ટન હશે. આ જહાજો સમુદ્રમાં તૈનાત ભારતીય નૌકાદળના યુદ્ધજહાજોને જરૂરી પુરવઠો અને સહાય પૂરી પાડવામાં મહત્વપૂર્ણ ભૂમિકા ભજવશે. ખાસ કરીને સમુદ્રમાં જ યુદ્ધજહાજોને ફરીથી ઈંધણ અને અન્ય જરૂરી સામગ્રી પૂરી પાડવાની ક્ષમતાથી નૌકાદળના જહાજોની લાંબા સમય સુધી દરિયામાં કામગીરી કરવાની ક્ષમતા વધશે.
હિંદ મહાસાગર ક્ષેત્રમાં નૌકાદળની પહોંચને મજબૂતી
FSS શ્રેણીના જહાજો ભારતીય નૌકાદળની દરિયાઈ સહનશક્તિ અને ઓપરેશનલ પહોંચ વધારવામાં મહત્વપૂર્ણ સાબિત થશે. આ જહાજોની મદદથી ભારતીય નૌકાદળ હિંદ મહાસાગર ક્ષેત્રમાં લાંબા સમય સુધી અને વધુ અસરકારક રીતે પોતાની કામગીરી જાળવી શકશે.
FSS-5ની કીલ લેઇંગ સાથે સમગ્ર કાર્યક્રમ શ્રેણીબદ્ધ ઉત્પાદન તરફ આગળ વધશે. આ ભારતની વધતી જતી સ્વદેશી નૌકાદળ નિર્માણ ક્ષમતાનું વધુ એક મહત્વપૂર્ણ ઉદાહરણ બનશે.
અગ્રણી અધિકારીઓની ઉપસ્થિતિ
આ કાર્યક્રમમાં આંધ્રપ્રદેશના મુખ્યમંત્રી એન. ચંદ્રબાબુ નાયડુ, નૌકાદળના વડા એડમિરલ કૃષ્ણ સ્વામિનાથન, સંરક્ષણ ઉત્પાદન સચિવ સંજીવ કુમાર સહિતના વરિષ્ઠ અધિકારીઓ અને મહાનુભાવો ઉપસ્થિત રહેશે.
