માર્ગ અને મકાન વિભાગ દ્વારા વર્ષ ૨૦૨૬-૨૭ હેઠળ નવા રસ્તાઓ માટે મંજૂરી; પ્રફુલ પાનશેરીયાની રજૂઆતને પગલે કામરેજના માર્ગ માળખાને મળશે વધુ મજબૂતી
સુરત
કામરેજ વિધાનસભા મતવિસ્તારમાં વિકાસકાર્યોને વધુ વેગ આપવા માટે રાજ્યના માર્ગ અને મકાન વિભાગ દ્વારા વર્ષ ૨૦૨૬-૨૭ અંતર્ગત કુલ રૂ. ૧૧.૪૦ કરોડના ખર્ચે ૪ નવા રસ્તાના કામોને મંજૂરી આપવામાં આવી છે. આ વિકાસકાર્યોને કારણે કામરેજ વિસ્તારના નાગરિકોને વધુ સુગમ અને સુરક્ષિત આવાગમનની સુવિધા ઉપલબ્ધ થશે.
કામરેજના ધારાસભ્ય અને આરોગ્ય રાજ્યમંત્રી પ્રફુલ પાનશેરીયાની અસરકારક રજૂઆતને પગલે મુખ્યમંત્રી ભૂપેન્દ્ર પટેલ દ્વારા આ વિકાસ પ્રકલ્પોને મંજૂરી આપવામાં આવી છે. નવા રસ્તાઓના નિર્માણ અને વિકાસથી સ્થાનિક વિસ્તારો વચ્ચેની કનેક્ટિવિટી વધુ સુદૃઢ બનવાની સાથે વાહનવ્યવહાર પણ સરળ બનશે.
માર્ગ અને મકાન વિભાગ દ્વારા કામરેજ વિધાનસભા મતવિસ્તારમાં મંજૂર કરવામાં આવેલા ચાર રસ્તાના કામોમાં પાલી મોટા રોડથી જોઈનીંગ હલધરું કેનાલ રોડનો સમાવેશ થાય છે. આ માર્ગ માટે રૂ. ૩.૨૦ કરોડની મંજૂરી આપવામાં આવી છે.
તે ઉપરાંત ગિરનાર હોટલથી આંબોલી ગામ રોડના વિકાસ માટે રૂ. ૧.૫૦ કરોડની રકમ મંજૂર કરવામાં આવી છે. આ માર્ગના વિકાસથી આંબોલી ગામ સહિત આસપાસના વિસ્તારોના લોકોને આવાગમનમાં સુવિધા મળશે.
ત્રીજા કામ તરીકે ઉભેળ-માંકણા કેનાલ રોડના વિકાસ માટે રૂ. ૩.૨૦ કરોડની મંજૂરી આપવામાં આવી છે. આ માર્ગ પણ કામરેજ વિસ્તારના આંતરિક જોડાણ અને વાહનવ્યવહારની દૃષ્ટિએ મહત્વપૂર્ણ માનવામાં આવે છે.
ચોથા કામમાં હલધરું કેનાલ રોડ તથા અલથાણ બ્રાન્ચની જમણી બાજુના ૫૦ આર.ડી.થી ૬૬ આર.ડી. સુધીના રોડના વિકાસનો સમાવેશ થાય છે. આ કામ માટે રૂ. ૩.૫૦ કરોડની મંજૂરી આપવામાં આવી છે.
કામરેજ વિધાનસભા વિસ્તારમાં મંજૂર થયેલા આ ચાર રસ્તાના કામોથી સ્થાનિક લોકોને અવરજવરમાં પડતી મુશ્કેલીઓમાંથી રાહત મળવાની અપેક્ષા છે. માર્ગ સુવિધામાં સુધારો થતાં ગામડાં અને મુખ્ય માર્ગો વચ્ચેનું જોડાણ વધુ સરળ બનશે. સાથે જ વાહનચાલકો માટે મુસાફરી વધુ સુગમ અને સુરક્ષિત બનશે.
કામરેજને રૂ. ૧૧.૪૦ કરોડના વિકાસકાર્યો
- કુલ મંજૂર કામો: ૪ રસ્તા
- કુલ ખર્ચ: રૂ. ૧૧.૪૦ કરોડ
- વર્ષ: ૨૦૨૬-૨૭
- વિભાગ: માર્ગ અને મકાન વિભાગ
- મુખ્ય ઉદ્દેશ: સુગમ, ઝડપી અને સુરક્ષિત આવાગમન
