આરોગ્ય મંત્રી પ્રફુલ પાનશેરીયાનો મહત્ત્વપૂર્ણ નિર્ણય; અમદાવાદ, સુરત, ભાવનગર સહિત રાજ્યની વિવિધ સરકારી હોસ્પિટલોને નવી સુવિધા મળશે, મોતિયાના ઓપરેશનમાં દર્દીઓને લાભ થશે
અમદાવાદ
રાજ્યના નાગરિકોને ગુણવત્તાયુક્ત અને અદ્યતન આરોગ્ય સેવાઓ ઉપલબ્ધ કરાવવાના હેતુથી આરોગ્ય મંત્રી પ્રફુલ પાનશેરીયાએ મહત્ત્વપૂર્ણ નિર્ણય લીધો છે. રાજ્યની વિવિધ સરકારી મેડિકલ કોલેજો અને હોસ્પિટલોમાં નેત્ર રોગોની આધુનિક સારવાર તથા મોતિયાના ઓપરેશન માટે ₹8.85 કરોડથી વધુના અંદાજિત ખર્ચે 18 અદ્યતન ‘એડવાન્સ ફેકોઇમલસિફિકેશન મશીન’ ખરીદવાની મંજૂરી આપવામાં આવી છે. આ નિર્ણયથી સરકારી આરોગ્ય વ્યવસ્થામાં આંખની સારવારની સુવિધાઓ વધુ મજબૂત બનશે અને સામાન્ય નાગરિકોને આધુનિક ટેકનોલોજી આધારિત સારવારનો લાભ મળશે.
રાજ્યની વિવિધ સરકારી હોસ્પિટલોમાં મશીનોની ફાળવણી
આરોગ્ય મંત્રીના અધ્યક્ષસ્થાને યોજાયેલી બેઠકમાં આ મશીનોની ખરીદી અને ફાળવણી અંગે નિર્ણય લેવામાં આવ્યો હતો. મંજૂર કરાયેલા મશીનો રાજ્યની વિવિધ સરકારી આંખની હોસ્પિટલોમાં તથા મેડિકલ કોલેજો સાથે સંકળાયેલી હોસ્પિટલોમાં ઉપલબ્ધ કરાવવામાં આવશે.
ફાળવણીની વિગતો અનુસાર, અમદાવાદની એમ. એન્ડ જે. ઇન્સ્ટિટ્યૂટ ઓફ ઓપ્થેલ્મોલોજીને સૌથી વધુ સાત મશીન આપવામાં આવશે. ભાવનગરની ગવર્નમેન્ટ મેડિકલ કોલેજ અને મોરબીની જી.એમ.ઈ.આર.એસ. હોસ્પિટલને બે-બે મશીન ફાળવવામાં આવશે.
આ ઉપરાંત સુરતની ન્યૂ સિવિલ હોસ્પિટલ અને ઓલ્ડ સિવિલ હોસ્પિટલ, જામનગરની જી.જી. જનરલ હોસ્પિટલ, વડોદરાની ઈ.એસ.આઈ.સી. જનરલ હોસ્પિટલ તેમજ જી.એમ.ઈ.આર.એસ.ની ગાંધીનગર, વડનગર અને હિંમતનગર સ્થિત હોસ્પિટલોમાં એક-એક મશીન ઉપલબ્ધ કરાવવામાં આવશે.
મોતિયાના ઓપરેશનમાં અદ્યતન ટેકનોલોજીથી મળશે મદદ
ફેકોઇમલસિફિકેશન મશીન મોતિયાની સર્જરી માટે ઉપયોગમાં લેવાતું અદ્યતન તબીબી સાધન છે. આ ટેકનોલોજીમાં અલ્ટ્રાસાઉન્ડની મદદથી મોતિયાને નાના ટુકડાઓમાં વિભાજિત કરીને દૂર કરવામાં આવે છે. મશીન દ્વારા અલ્ટ્રાસાઉન્ડ એનર્જી, વેક્યૂમ અને પ્રવાહીના પ્રવાહ પર સચોટ નિયંત્રણ રાખી શકાય છે, જે સર્જનને ઓપરેશન દરમિયાન વધુ સરળતા અને નિયંત્રણ પ્રદાન કરે છે.
આધુનિક ટેકનોલોજીથી સજ્જ આ મશીનો આંખની સર્જરી દરમિયાન થતી જટિલતાઓનું જોખમ ઘટાડવામાં અને દર્દીની રિકવરી વધુ સરળ બનાવવામાં મદદરૂપ બની શકે છે. પરિણામે, સરકારી હોસ્પિટલોમાં મોતિયાના ઓપરેશન માટે ઉપલબ્ધ ટેકનિકલ ક્ષમતામાં વધારો થશે.
આંખની અંદરના દબાણને સ્થિર રાખવામાં મદદરૂપ
આ મશીનની મુખ્ય વિશેષતાઓમાં આંખની અંદરના દબાણમાં થતા ફેરફારોને ઓળખીને તેને સ્થિર રાખવામાં મદદરૂપ થતી સિસ્ટમનો સમાવેશ થાય છે. તેમાં ઉપલબ્ધ CASE (Chamber Stabilization Environment) ટેકનોલોજી વેક્યૂમ અને પ્રવાહીના પ્રવાહમાં થતા ફેરફારોને નિયંત્રિત કરવામાં મદદ કરે છે. આથી ઓપરેશન દરમિયાન આંખની અંદરના દબાણમાં અચાનક ઘટાડો થવાનું જોખમ ઘટાડી શકાય છે.
મશીનમાં રહેલી પેરિસ્ટાલ્ટિક પમ્પ સિસ્ટમ પ્રવાહીના પ્રવાહ અને વેક્યૂમનું ચોક્કસ નિયંત્રણ જાળવે છે. તેના કારણે સર્જનને મોતિયાના કણોને સક્શન ટીપની મદદથી અસરકારક રીતે દૂર કરવામાં સહાય મળે છે.
સર્જન માટે સરળ નિયંત્રણ, દર્દીને ઝડપી રિકવરીમાં મદદ
મશીનની યુઝર-ફ્રેન્ડલી કંટ્રોલ સિસ્ટમ દ્વારા સર્જન ફૂટ પેડલની મદદથી ઓપરેશનની જરૂરિયાત પ્રમાણે અલ્ટ્રાસાઉન્ડ એનર્જી, વેક્યૂમ અને પ્રવાહીના પ્રવાહનું નિયંત્રણ કરી શકે છે. તેનું ‘Ellips FX હેન્ડપીસ’ સર્જરી દરમિયાન નાના ચીરાની આસપાસ વધુ પડતી ગરમી ઉત્પન્ન થવાનું જોખમ ઘટાડવામાં મદદરૂપ બને છે.
આના પરિણામે કોર્નિયામાં સોજો આવવાની શક્યતા તથા કેટલીક અન્ય આડઅસરો ઘટાડી શકાય છે અને દર્દીને ઝડપથી સ્વસ્થ થવામાં મદદ મળી શકે છે.
રાજ્ય સરકારના આ નિર્ણયથી સરકારી હોસ્પિટલોમાં આધુનિક નેત્ર સારવારની સુવિધાઓનો વ્યાપ વધશે. ખાસ કરીને મોતિયાની સર્જરી કરાવનારા દર્દીઓને અદ્યતન સાધનો સાથે સારવાર ઉપલબ્ધ કરાવવાની દિશામાં આ પગલું મહત્ત્વપૂર્ણ સાબિત થશે. સાથે જ, સરકારી આરોગ્ય સેવાઓને વધુ સુસજ્જ બનાવી નાગરિકોને ગુણવત્તાયુક્ત સારવાર પૂરી પાડવાના પ્રયાસોને વેગ મળશે.
